Governu Austrália, kolabora ho Gabinete Vise Primeiru Ministru no Ministru Koordenadór ba Asuntu Ekonómiku ho kontente anúnsia katak Governo rua ne’e sei realiza Konferénsia Ekonomía no Negósiu Timor-Leste – Austrália 2025, ne’ebé sei hala’o iha Dili husi loron 6 to’o 8 fulan Agostu tinan 2025.

Konferénsia Ekonomía no Negósiu Timor-Leste – Austrália hala’o ba tinan rua ona, ho hanoin ida atu reflekta komitmentu nasaun rua nian ba apoiu dezenvolvimentu setór privadu.

Evento anual ida ne’e ho nia objetivu atu haforsa parseria dezenvolvimentu ekonomía no negósiu liu husi halibur lider emprezáriu sira, investidór sira no polítikus sira husi Timor-Leste no Austrália.

Konferénsia ne’e sei fo prioridade ba kolaborasaun iha setór prinsipál sira hanesan turizmu, manufatura no prosesamentu, agrikultura no mina.

Emprezáriu no investidór sira husi nasaun Timor-Leste no Austrália enkoraza atu partisipa no foti vantazen husi kria rede amizade, fahe koñesimentu no kria oportunidade parseria ne’ebé mak fornese husi konferénsia ne’e.

Rejistrasaun loke ona. Partisipante hirak ne’ebé interese bele rejistu liu husi website ofisiál konferénsia: https://www.tlaucon2025.com/register

Ba informasaun klaru, favor vizita www.tlaucon2025.com no kontaktu tlaucon2025@prosivu.tl  ka +67078336720

[REMATA]