DÍLI, 6 Agostu 2025 – Preparasaun final ba realiza Konferénsia Ekonómiku no Negósio Timor-Leste – Austrália 2025 (TLAUCON2025) lao hela. Konferénsia sei akontese husi loron 7 to’o 8 Agostu iha Sentro Konvensaun Díli, ne’ebé organiza ho kolaborasaun entre Gabinete Vice-Primeiru Ministru Timor-Leste no Governu Austrália.

TLAUCON2025 sei loke ho diskursu prinsipál husi Sua Excelénsia Primeiru Ministru Kay Rala Xanana Gusmão, no Dr. Anne Aly MP, Ministru Dezenvolvimentu Internasionál Austrália no Ministru Negósiu Kiik no Asuntu Multikultural, ne’ebé hatudu kompromisu forte entre Timor-Leste no Austrália hodi apoiu dezenvolvimentu setor privadu no estende relasaun ekonómiku ne’ebé sei kontinua dezenvolve.

Agenda kompletu, publika ona iha página tlaucon2025.com, inklui diskursu prinsipál, sesaun temátika no diskusaun paínel, ne’ebé sei foka iha setor estratéjiku haat: turizmu, agrikultura, manufatura no prosesaun, no minerál. Konferénsia ne’e sei aprezenta mos diskusaun espesíal kona-ba Adezaun Timor-Leste ba ASEAN no nia impaktu ba komérsiu no investimentu iha Timor-Leste no rejiaun.

Momentu importante ida husi TLAUCON2025 mak, sei halo asina Memorándu Entendimentu (MoU) entre Kámara Komérsiu no Indústria East Kimberley husi Western Australia no Kámara Komérsiu no Indústria Timor-Leste. MoU ne’e sei formaliza relasaun kooperativa entre kamara negósiu rua ne’e, rekonhese katak sira nia papel kolaborasaun sira iha promove dezenvolvimentu setor privadu no kompremetidu atu apoiu kresimentu ekonomiku no parseria komérsial.

TLAUCON2025 sei iha mos Feira Komérsiu ne’ebé sei aprezenta emprezáriu hamutuk 50 husi Timor-Leste no Austrália, ne’ebé mak reprezenta variedade indústria sira. Feira ne’e sei sai plataforma atu promove produtu lokál ne’ebé inovador no servisu, no atrai investimentu.

Empreza no delegadu sira ne’ebé mak partisipa iha konferénsia, asesu mos ba website Business to Business (B2B) Matching, ne’ebé fó oportunidade ba emprezáriu sira atu halo koneksaun ho partisipante sira seluk, hare’e perfil emprezáriu nian, no organiza enkontru sira antes loron konferénsia. Inisiativa ne’e sei apoiu rede tarjeitu sira no parseria ba dezenvolvimentu.

TLAUCON2025 sei inklui mos eventu paralelu ba rede (networking) ne’ebé eskluzivu, ne’ebé organiza husi Timor-Leste Australia Business Council, ho apoiu husi TradeInvest Timor-Leste, Austrade no Embaixada Austrália, inklui mos vizita ba fatin-projetu iha área turizmu, agrikultura no manufatura.

Vice Primeiru Ministru no Ministru Koordenadór Asuntu Ekonomiku, Sua Excelénsia Senhór Francisco Kalbuadi Lay, hatete Timor-Leste sente honra organiza TLAUCON2025 ba tinan da-ruak.

“Ami hein katak konferénsia ne’e sei sai katalizadór atu hametin relasaun komérsiu no investimentu, no apoiu kooperasaun ekonómiku ne’ebé klean entre nasaun rua ne’e,” nia hatete.

Embaixadora Austrália ba Timor-Leste, Sua Excelénsia Sra. Caitlin Wilson, mos hatete TLAUCON nudar oportunidade diak atu esplora oportunidade komérsiu no investimentu ne’ebé kontinua dezenvolve entre Austrália no Timor-Leste.

“Austrália sente honra apoiu diskusaun sira ne’ebé kontribui ba dezenvolvimentu ekonómiku Timor-Leste, no fó benefísiu mútual ba nasaun rua ne’e,” nia hatete.

Ho partisipante hamutuk 400 liu mak sei mai, TLAUCON2025 promete sei fornese loron rua ne’ebé dinamíku ho diálogu, hari’i parseria no hetan rezultadu pratiku ba negósiu.

 

[REMATA]