Governu Austrália, kolabora ho Gabinete Vise Primeiru Ministru no Ministru Koordenadór ba Asuntu Ekonómiku no Ministru Turismu no Ambiente, TradeInvest Timor-Leste, no Kamara Komérsiu Indústria Timor-Leste, preparadu ona atu realiza Konferénsia Ekonómia no Negósiu Timor-Leste – Austrália 2025 husi loron 7 to’o 8 Agustu iha Centro de Convenções de Dili (CCD), Merkado Lama, Dili.

Objetivu prinsipál husi konferénsia ne’e mak, atu hametin relasaun ekonómiku no negósiu entre Timor-Leste no Austrália, liuhosi halibur lider Empresarial sira, investidór sira, no polítika nain sira, hodi halo koneksaun, kolaborasaun no eksplora oportunidade iha setór prinsipál ha’at mak hanesan: agrikultura; turismo; manufatura no prosesamentu; no minerais and rekursu.

Konferénsia sei hala’o iha sesaun tematíku rua iha kada loron. Iha loron da-huluk, sei foka ba turizmu no agrikultura, no loron da-ruak sei kobre manufatura no prosesamentu, inklui mineral no rekursu. Loron da-ruak sei inklui mos painel diskusuan kona-ba Timor-Leste nia adezaun ba ASEAN.

Ami kontente anunsia mos katak, oradór importante sira sei partisipa mos iha konferénsia ne’e. Oradór sira ne’ebé konfirma ona mak inklui influensadór prominente sira iha rejiaun, hanesan: Señor Nicholas Moore, Enviado Espesiál Austrália ba Sudeste Aziátiku no Señór Shane Walden, Embaixadór Negosiu Austrália ba Timor-Leste. Sira-nia hanoin no prezensa sei fó kontribuisaun iha diskusaun kona-ba kooperasaun ekonómiku no dezenvolvimentu sustentavel entre Timor-Leste no Austrália, no sublinha importansia konferénsia ne’e nudar plataforma ba diálogu, kolaborasaun, no parsería ba futuru.

Durante konferénsia loron rua, partisipante sira sei explora oportunidade iha negósio no parsería, estabelese rede negósio ho negósio, no buka atu komprende diak liu tan posibilidade sira ba halo kooperasaun negósio ne’ebé kle’an liu entre nasaun rua. Konferénsia ne’e mos iha objetivu atu hetan koñesimentu ne’ebé bele hametin no apoiu ajenda ba reforma ekonómika ne’ebé lidera husi setór privadu iha Timor-Leste.

Lideransa emprezarial hamutuk 300 husi Austrália no Timor-Leste mak espekta sei tuir konferénsia ne’e, ho kompañia hamutuk 40 mak sei aprezenta sira nia produtu no servisu iha feira komérsiu.

Atu hatene informasaun klaru liu tan kona-ba konferénsia ne’e, favor vizita website ofisíal konferénsia nian iha: https://www.tlaucon2025.com/

(Remata)